小試牛刀，加按一開二

by SK @ 2010-06

用195萬買咗個灣仔實用三百幾呎嘅單位，全間屋拆散再做，裝修連家電我用咗 16萬，剛剛上星期五租出，月租$14,400。 回報認真和味

層樓喺集成對面，係舊年12月頭買嘅，業主叫208萬，已放咗盤2個月，因為對上2個成交單位都喺 180萬同185萬。 睇樓嗰日係星期五，杜拜啱啱爆煲，氣氛幾差，大拿拿200萬對我等低收入人士係好多錢啊，一于問財叔有乜意見。 佢話喺灣仔實用面積有三百幾呎、平地lift、十幾樓、唔洗200萬都算ok啦，遲啲咁嘅價位買唔番嘞。 於是第二日叫agent還195萬，即成。 1月中收樓，但因過年，要到3月頭先至開到工，5月中完成，放租盤3個禮拜租出。

起初我都唔明財叔點可以買咁多樓，後來先知係番按。 要攞啲老本再買多層樓就真喺要認真諗過，但係可以用other people's money就唔同講法。 我從來冇諗過番按層樓因為都差唔多供完。 於是跟財叔嘅指導，同銀行番按借咗340萬，月供唔洗12,000，依家有2個單位收租，扣埋差餉管理費，有成六千蚊落袋，重多咗2層樓喺手，感覺從未如 此良好，但我會時常告介自己這不過是小成績，不可似驕傲，it's still a long way ahead。 再次多謝財叔嘅無私奉獻!

-------------
學神:
睇完SK既文章之後，我有D問題問佢，我既問題如下:  

我想問下你既雪櫃同洗衣機係咩MODEL?  係咪已經格過晒價最抵用或有其他原因? 因為我未試過包雪櫃、洗衣機，咁第日有機會裝比租客我可以照抄，不用去左睇右睇，哈~!.. 懶爆~!

 
另外，想問下廚房盤花係咪流野?  有冇番番比租客，定係留番下次當道具? 哈~

 
另另外，上圖我見爐頭右邊有條隙，係未整好定係有其他原因?  我見左邊個升盤邊又唔覺有隙，所以好奇想問下~!

另另另外，好奇想問下呢幾個櫃係真定假? 門出面樓底好高下，唔似有櫃。

------------------

by SK @ 2010-06
我邊有咁酲，不個勝在唔怕醜乜都問，財叔同個 agent比我煩到嘔，買嘢貼士由財叔提供﹕傢俬電器(冷氣機除外)去直銷中心買、冷氣機就去豐澤。  機本上買最平就算(但都唔好太樣衰)，洗衣機、電爐頭、抽油烟機牌子係嘉榮華，雪柜係海信，電熱水爐係朗高圓筒型收咗上浴室嘅天花，咁就慳咗啲位。電視 機、電視柜、梳化喺朋友俾，因為我完工時佢啱啱要離開香港，咁就有啲免費嘢用，喺怡家買個新梳化套成張梳化就全新一樣嘞。

盤花係真假混合， 花係假嘅，但係加咗啲石春同水，咁就有真嘅元素嘞，於是整體望埋去就覺得幾真。盤花係搵食架撐，一於拎走留番下次用。 個廚櫃檯面太大，一定要分兩件先入到，本來呢啲人造石可以用機磨平就冇條隙好似原整一件，個判頭又話唔識做，叫人做佢又話貴，唔夠價，怕咗佢嘞，等佢打髎 就算數收貨囉，等第時個檯面再花啲嗰陣時先至叫師父一次過做好佢。間房隔離就係浴室，而浴室又用假天花，head room 有成19吋，見層樓咁細都冇乜地方儲物，偷咗呢個位造一行吊柜就好啲啦，起碼第時唔掂返嚟痞都有定擺嘢呀。

有時我覺得做啲嘢出嚟連自己都唔 鍾意，又點會期望其他人會鍾意呢，所以起碼都要過得自己，不過遲啲如果重有機會再咁做落去，可能都唔會堅持呢。 個裝修判頭成日話喺灣仔冇人用呢啲顏色(牆身係灰色)、磚面要光身，廚櫃冇人咁造，諸多借口，都係想方便佢自己，我地一於堅持，裝修完佢自己都話效果幾 好，真係比佢吹漲。

買呢個單位時都係諗住收九千至一萬左右，因為加埋翠屏嘅租就夠供樓雜費，重有少少剩已經好開心啦。 層樓係喺軒尼斯道，租客係英國人。 因為已經番按自己層樓，買呢個單位唔洗做按揭。