早幾日，新世界發展(00017)主席鄭家純公開預測今年樓價跌一成，但大跌機會不大，理由係除咗市場有需求外，因為建築成本高，樓價冇乜可能會插水，純官話：「建築成本維持咁高，你點可以叫發展商蝕本賣。」
話今年樓價唔會大跌，Loser大體都認同，但因為建築成本高，就認為樓價好難跌，咁就講唔過去，點解產品價格一定可以賣得高過成本？實情係好多行業或公司，錯誤判斷市場或行業前景改變，需要將產品以低於成本出售的事情，真係俯捨皆是。
大家諗諗，經營間服裝店，啲貨品滯銷，你都要清貨，唔通你跟啲客講，冇得減架，我都咁貴返貨。即使係世界最大企業嘅石油生產商，佢地一桶油成本平均約四十美元，早前油價跌到廿幾蚊，唔通佢話成本都咁高，我地冇可能蝕賣㗎。唔想蝕係一回事，係生意人主觀意願，但現實歸現實呀！
同樣道理，樓市唔係未經歷過要大劈價，大家睇睇九七亞洲金融風暴後到沙士期間，發展商要錢套現，都要將物業平賣，更加有啲要蝕讓，所以建築成本高係一回事，跟樓價係有啲關係，但絕對唔係最重要，千萬別俾發展商啲說話「昆」咗。
其實喺地產市場，都有唔少似是而非嘅言論或竟見，除咗上面話建築費咁高，樓價點會跌呢啲咁荒謬說話外，大家可能都聽人講：「長線持有物業實冇衰。」
首先唔討論長線樓價係咪唔會跌，單單講乜嘢係長線，究竟係幾長？日本樓市跌足廿幾年，今日東京樓價平過香港天水圍，更加唔好話返回八十年代尾九十年代初高峰。即使好似香港九七之後樓價到0三年至復蘇，你又等唔等到嗰日，特別係身處其中，七年間日日見樓價係咁跌，跌到心灰意冷，唔少港人都賣咗層樓。另外，喺當日經濟情況咁惡劣下，你可唔可以守到都成問題
又有買樓人話：「貴買咗，自住冇問題。」喂，呢啲簡直自欺欺人，買貴咗即使自住，你個個月供款就供高咗喇，如果利息回升，你仲要俾多啲息。
至於有人話「有買貴，冇買錯。」就更加無稽，買貴咗就已經係錯喇，點會買貴咗又冇錯呢！不過咁，呢啲說話用嚟安慰啲買貴樓嘅人，幫佢做吓心理輔導，咁又另計。
引用: 金融loser文章
沒有留言:
張貼留言