尖沙咀鬼城商場~首都廣場

早年我都對這個尖沙咀首都商場有興趣，200萬入場費，做下小生意點都得，現在好彩無買。我估計若干年後，成間商場都再被收回，再從拍，歷史再度從演。

大陸有啲較偏嘅地方早幾年係咁起樓，結果供應大到無倫，加上近一兩年中國經濟放緩，於是賣唔出，結果俾人叫鬼城。勢估唔到，香港有個地方都有咁情況，不過並非住宅而係商場，呢個就係尖沙咀首都廣場。

首都廣場喺漆咸道南百樂酒店旁，若然你走去行行，會發覺個場好乾淨，燈火好光猛，舖位間隔又好整齊，兼夾行得好舒服。點解會咁正？實情係因為九成半以上舖位冇人租，更加冇人行商場，因為冇人，所以咪乾淨，所以咪夠光線，所以條走廊即使好窄，行走時絕對唔會膊頭撞膊頭。

捉買家貪平心理

搞到個場咁，罪魁禍首都係個賣家，佢只係諗點賺到盡，從冇想過接手班人。當初業主拆售時，竟然可以賣個滿堂紅，完全係捉到人類最基本心理，就係「貪平」。佢將個場間成幾百個得幾十呎商舖，雖然呎價好貴，但因為舖位細，總體銀碼都係兩百零三百萬，一般人都唔難負擔，賣家仲話提供兩年租金五厘保證，加上當時香港舖市旺到無可想像，於是啲人覺得拎三球可以喺老尖做舖主，仲有兩年租金保底，點會輸呀！於是咪搶住買，到最梗係領嘢。

個場最大問題係啲舖嘅間隔，全部隔成幾十呎舖仔，唔知可以做乜生意，你話做服裝，連個試身室都放唔落，你話做飲食，根本好難放啲餐廚用具，就算你想賣吓精品，都細到冇地方擺東西，除非你買三四間舖打通咁又另計。但既然係針對啲小買家，極少有人有能力買幾個舖打通。

老實講，搞啲有幾層樓嘅商場仔，好多時會喺最高一層開間大型食肆，例如整間稻香或者大型快餐店，當然租金會好平，願意收平租目的只有一個，就係可以帶旺人流，將啲客人扯上最高樓層。當佢食完飯飲完茶，通常會逐層行落樓，人性係咁，你又會順便行吓個商場，於是乎咪可以帶動人流。但首都廣場賣家一早只係諗賺到盡，點會理呢啲嘢。

隨時熄燈關門

搞細商場好多時要有一個主題，例如賣電話又好，賣電腦又好，咁先易聚人，但今日冇人去統籌，小業主又各自為戰，想搞主題都唔容易。再講，個場啲舖細到咁，要搵個行業啱做主題，其實都唔容易。

另外，今時今日搞商場，推廣宣傳好重要，一時要請明星撐場，一時又要搞乜乜展覽，又或舉行啲生鬼活動，更要周不時抽獎送禮。好可惜分拆商場己經賣散，大業主都收夠籌走人，仲邊有閒情逸緻去搞呢啲嘢，活動冇人扯頭纜，你話小業主點搞？

Loser咁睇，若然當初賣家冇話送管理費，或者只係送一個期限（當然唔會係一萬年），加上租金保底到期，咁個商場部份業主好可能唔交管理費，結果管理公司退出，隨時變成烏燈黑火嘅商場，最終係點，咪真真正正連鬼都唔去嘅商場囉。