銀行從未借遮 何來收遮

有消息話銀行財困，連日來向客戶追數，俗稱落雨收遮，我覺得很奇怪，銀行在過去幾年，對放款態度，從未放鬆，或者是基於金管局的要求，但總括來說，銀行並不是財困，亦沒有落雨收遮。

消息用洋參大王做例子，話銀行唔救大王，其實，大王用自己股票抵押去借錢，即是行到最後一步，如果銀行在股票被斬倉時出手相助，很有可能貸款變成壞帳，而洋參大王犯了一個大忌，就是公開炒樓活動，變相將自己變成一個物業炒家，金管局現在最最積極打壓的一班人，一般炒家都話自己是長線投資者，如果是物業炒家，是會受到非常嚴謹壓力測試，而事實上，物業投資者是絕對唔容易做，有正行生意更加唔好做，因為銀行會收緊信貸，變成無衰攞嚟衰。

今次過年，我真的不覺得銀行追數，在金管局的壓力測試下，其實是追無可追，如果按既定時間表還款，一定唔會追數，如果脫期被銀行追，就不能夠話銀行落雨收遮，千祈唔好屈銀行，現在，銀行家已經很慘，有錢又不能夠放，仲俾財務公司爬頭，仲俾人屈落雨收遮，財仔真的是掩住咀笑。