為恒發洋參做馬後炮死亡聆訊

恒發洋參（0911）上周四股價由近4毫跌到3仙4，短短半小時股價勁插九成，下挫之急勁令人驚訝。睇番整件事，容許Loser馬後炮，若然有留意公司過去公告，不難發現好多蛛絲馬迹多，特別1月25日段公告，更加係壓跨洋參王國的最後一根稻草。

段公告標題話就叫做2015年度財務資料估計，肯細心睇，根本係一段盈利預警，但因為發公告嗰位人兄識得玩文字，大家隨時被誤導，仲以為公司係發緊盈喜。

內容簡單講係公司話2015年下半年度開支大增，導致盈利較上半年大幅減少，但全年表現仍較2014年度高5成。驟眼睇話全年升咁多，有啲報道就話公司全年預計升5成，但投資者實際肯做多啲功夫，就會發覺大件事。

表面盈喜實為盈警

事關2015年度中期盈利4.38億，2014年度全年盈利2億，若根據公告講增加5成，咁2015年度盈利咪約3億。嘩！一睇不得了，俾中期少咗成億，換言之下半年冇賺不特矣仲要蝕添。而今個月初恒發洋參個股價仲係徘徊喺6毫零，市盈率（PE）成50倍，以呢個業績表現，點支撐咁高PE。

好喇，我哋都俾機會公司解釋吓，睇睇當天份公告，歸咎理由係去年下半年加元同人仔匯率大幅下跌，第二是舊年1月出售購股權付款，第三係零售營銷費開支。

睇完呢幾點解釋你會更疑惑，恒發啲人參有大部份係來自加拿大，只有部份野山人參要用美元結算。根據恒發中期報告，有七成半營業額以上人參屬加拿大種植參，加元下跌，照理恒發洋參可以慳番更多成本。另外，中期業績內講到明，話貿易應收賬係全以港元計，咁人仔跌又未必有咁大影響。至於話零售營銷開支大增，但公司去年九月喺北京開咗一間分店外，似乎冇乜大搞零售，究竟係點要睇睇全年業績。

其實1月20日已經有春江鴨沽緊貨，股價由6毫幾跌到5毫邊，到公告出街前，股價已挿到4毫子左右。怕且係股價跌低過按倉值，證券行追咗幾日都冇填番個倉，於是咪掟貨。

百億王國不堪一擊

恒發今次咁跌，睇怕好多麻煩跟尾，公司有若干借款，好似舊年發行啲債券或票據，可能有啲條款會被觸發而隨時俾債主叫還錢。再睇中期業績，公司財政狀況都唔係話幾好，銀行短期借貸都16億幾，手頭現金只有兩億二，雖則有14.4億抵押銀行存款，但唔知係咪可以隨時動用。公司應收賬又達13億，較2014年大增一倍，真係擔心收得番幾多。

若然大家再跟踪一吓恒發洋參之前公告，去年11月12日話發行15億可換股債券，點知一搞成個月，似乎冇人認購，到12月11日協議失效，發債唔成，令資金鏈有一定壓力。

恒發洋參過唔過到呢一劫好難講，半年多前股價曾經高見1蚊，大股東楊永仁揸7成1股權，身家過百億，點知富豪夢只係過咗幾個月癮就冇咗，原來洋參王國建立喺浮沙上面，不堪市場一擊。