贏粒糖贏間廠
上一篇網誌講開A先生為左上公屋放棄左應有既生活，掙左一身債。近年聽翻身邊朋友既故事，發覺都有唔少呢類CASE，為左Keep住間公屋而放棄左好多機會，因少失大!! 贏粒糖、輸間廠!
先 講自己，我都係一個公屋仔，5歲果年一家七口由租住西環晉成街唐三樓(依家石塘咀街市舊址)板間尾房搬左去柴灣既四百幾呎全新公屋，當時有搬左去豪宅既 感覺~! 好新、好大! 我仲記得我一日入屋仲衝左去廚房既石屎灶頭企左上去話:" 呢度可以做床播~! 反正題先，在往公屋呢段日子初段，我父母都好辛苦，出外做野之餘要照顧五件化骨龍，間中又會攞D外發返屋企做，穿膠花日子我都有參與過!! 因為我地一家平日慳爆，我媽又係一個儲錢專家，生活慢慢改善。到左八十年代中，家人其實係有首期去買私樓，但我父母一直都係想保住間"公屋"而唔敢買私 樓。我媽同我講如果當年我地唔係因為拆樓分左間公屋，我家一定晨早買左私樓，而且一家唔止一層。我媽做工廠妹既時候有個女工友教佢買樓收租，儲夠首期就買 左租比人等人同佢供，佢真係買完一間再一間。我媽當時好Buy佢，不過我父母因為公屋戶主買私樓之後要交翻間公屋出黎而卻步 。而我D家姐當時又未夠秤做業主，所以錯失左好多置業良機。為左要保住一間公屋既居住權而冇踏出第一步，你話值唔值得?
另一個例子， 一位長輩朋友在97年之前做過下地產經紀，對某地區既物事業瞭如指掌，97年之後因為樓市唔多精神而轉左行。呢位長輩都係勤力到爆，工餘時間會做好多兼 職，包括裝修散工、開的士、攪年宵，總之一有錢搵就會同我一樣對眼發晒光!! 長輩朋友佢不時都有留意物業市場，見佢咁慳又咁勤力就知佢儲首期冇難度，難就難在佢地一家住公屋唔可以用自己名去買私樓，所以一直之來都係搵人夾份買樓。 佢要搵到身邊既人做Partner 都唔易，有D唔 buy 佢買樓; 有D唔信佢既眼光; 有D冇銀用; 有D冇供款能力 ; 總之因為佢D潛在Partner 怕呢樣、怕果樣而錯過左好多機會。如果長輩朋友唔係為左要保住一間公屋既居住權，成個故事好大機會會改寫!!
唔單止公屋，因少失大在日常生活既例子多到不得了，近一兩年發生在我身上都唔少。我依家都學緊點樣去睇遠D，唔好 "贏粒糖"而滿足，我要 "贏間廠" 翻黎 ! 呵~!
其實佢地犯左個好大的錯誤~
1. 有公屋係可以買樓, 只係申請公屋時唔可以有樓。有樓只會係入息申報的時候,報番自己的樓有冇出租OR 空置,出租計番租金收入,空置就計"應課差餉租值" 除以12個月再扣減20%的折舊率。 過左限額就要交倍半租OR 雙倍租~所以住公屋係可以買樓~
2. 如果佢真係驚,可以叫非戶籍的人買樓, 即係減左名的子女買一樣可以~
不過講到尾,係好多人都驚買左樓價跌,或者息口好高~ 因為97的教訓太大,出現好多負資產個案，造成好多陰影。
一係就心口冇個勇字,驚呢樣個樣,驚冇工開,驚租唔出,驚煩,驚一大筆的投資。最搞笑的係成日覺得個市一定會跌~ 冇錯,不過你的機會唔係冇左就你交緊租~
沒有留言:
張貼留言