2014年4月29日 星期二

港鐵的最怕066

最多新聞應該算是港鐵(066),爆完列車意外,又爆高鐵延遲,仲有高層落馬。不過,睇番股價似乎就暫時對股價唔係最大影響,佢股價過去一年最高係32.5元,呢個價差不多係去年中造出,跟住就一度回落,最低去過26.31元,呢個係今年2月左右出現,跟住股價已經反彈。

        從走勢嚟睇,港鐵係半隻地產股,股價似乎受地產市道影響,多過受營運表現或新聞影響。去年頭雖然政府打壓樓價,但效果不彰,樓價不跌反升,於是帶動港鐵股價上升,到了今年樓價回落,市場較為憂慮,佢股價跟住下跌,呢兩個月見到政府無再出招打壓樓市,佢嘅股價就穩定下來,就算出現諸多壞消息,似乎仲未影響到投資者的信心。

        港鐵怕樓跌多過怕官

        聽會計界高人話,港鐵收入之中,有十幾億來自管理層同顧問費用,呢啲相信包括幫政府管理高鐵項目,至於港鐵做呢啲工程有無因為超支抑或疏忽被索償的風險呢?

        年報似乎無交代,咁樣會唔會影響未來盈利呢?中環茶友就答,若然係外國經常打官司的地方,當然唔排除港鐵會被人告啦,但香港唔興呢家嘢喎,而且港鐵獨家之局唔係咁易打破,所以搞瓜幾個高管唔難,要搞瓜成家公司就唔係咁易,究竟��家呢啲工程延誤有無索償風險,管理層最好交代吓啦。

        不過,從過去經驗,港鐵唔怕官、只怕管,尤其係最怕管樓市,除咗呢樣,其他都唔係咁驚㗎咋。

2014年4月28日 星期一

為何一個超級普通阿伯,勁!有錢?(必睇文章)

    

上個星期講到五個可以令你輸大錢無得退休的原因,各界反應熱烈。好多朋友話會剪低篇文章,貼喺牆上面,時刻提醒自己,更會畀仔女睇,叫佢哋唔好做呢啲蠢事。

        特別係文章裏面提到的碌卡消費,原來好多人都唔知道只還最低還款額(Minpay),年息會去到35厘,還唔足Minpay,仲升到40厘咁恐怖。之前有網友問我,上海同香港股市互聯互通,個市會唔會轉好呀?佢可唔可以碌卡借錢入定貨?又問我有冇股介紹?

        碌卡炒股無運行

        我話其他投資問題答你唔到,但碌卡炒股呢個問題就非常容易答。唔碌卡借錢,一年已經慳到35%至40%啦。呢個世界,幾難至搵到一年必穩賺咁多的投資?即使係世界第二大富豪、股神巴菲特,佢投資的每年平均回報都係15%至20%,如果你搵到一項投資,可以年賺35%至40%,年年如是,過得二三十年,你就可以做世界首富啦。攞你錢的發卡公司賺咁多錢,等如你畀人攞緊咁多錢,你就知幾大鑊啦。所以,欠緊卡數嘅人,還卡數就係穩賺不賠的投資啦。

        你可能會問,借卡數炒股,唔使借成年,借一兩個月炒完賺咗咪還番畀佢囉。我就話財不入急門,你愈心急要一炒即中,通常就死硬啦,想一兩個月,結果就借咗一兩年,利疊利,命都無。

        有網友早前都問過我,唔借錢,唔炒股,唔搏殺,邊有回報?點會發達?講起回報,我經常講要分開「投資的我」同「投機的我」,「投資的我」買大股無死錯人,每年低揸高沽就掂,甚至長揸都得。好多人覺得好悶,覺得這種做法唔會成功,就唔會做。我不妨講個成功的真實個案,同大家分享。

        我有個朋友的90歲老爸剛剛過身。清點遺物時,發現竟然留低價值160萬的股票。仔女都非常驚訝,點解老爸會剩低咁多錢?或有人話,160萬,都唔算好多。但呢位阿伯後生未退休時,只係啤膠工人,每月收入肯定唔會多。阿伯過身時90歲,65歲退休,已經退休25年,正當係啤膠行業開始式微的時候。老實講,一個啤膠工人,退了休25年,死後仲剩低160萬遺產。你話喺香港唔可以累積財富,又係唔係太睇小自己呢?

        唔聲唔聲成小富

        我同朋友了解一下,點解佢老爸一個草根工人可以剩到咁多錢成為小富。朋友所知不詳,只知梗概。他老爸煙酒不好,平時唔會亂花錢,25年前攞到幾十萬退休金,大部份買了股票。佢老爸買嘅股票,都係大股,例如中電(002)、長實(001)、和黃(013)同中鋁(2600)之類。買咗之後,唔經常進進出出,通常係見到回報比較高嘅時候才沽出。平時就靠老人金、股息同仔女少少飲茶錢,就搞掂日常生活。

        朋友舉了他老爸買中電嘅例子。早幾年約30幾元買入,坐咗幾年,食咗幾年息,2009年見到股價升到60幾蚊,就沽咗。眼光又的確幾準,中電之後跌番落去50幾元,上星期至上番60元,阿伯沽完中電都差唔多啦。朋友話老爸平時都有睇吓報紙,會留意吓中電的生意情況,但唔覺得佢對中電有咩遠見卓識,只係覺得中電係電力公司夠穩陣,又派高息,所以就買吓;至於沽貨係見佢當時升得咁快咁急所以沽,亦唔係睇通佢有乜唔妥。

        低揸大股慢慢坐

        阿伯最後剩低的股票,比較多的是和黃,佢2009年時入貨(應是沽了中電套現咗),股價只係70幾蚊,上周已經升到106蚊。講開和黃,順帶一提陸羽仁在三年前和黃70幾蚊嘅時候,都講過幾次,和黃未來幾年盈利應有增長,買得過。當時我公司有位靚女睇完呢個專欄,就問我好唔好買,我話短期上落唔敢包,睇中長線就可以,靚女就買咗,到最近沽出部份,執咗唔少,話要多謝我。我話唔使多謝,賺錢都係因為佢夠耐性,可以坐足幾年,無買完回少少就走啫。

        講番阿伯,睇佢一生經歷,讀書唔多,收入微薄,後生時仲有少少好食懶飛,鍾意就開工,唔鍾意就唞吓,到老來才定性。退休25年,90歲過身,死咗之後遺產160萬元。如果大家有用過我喺《巴士的報》(www.bastillepost.com)搞的「巴士的退休資金計算機」,都會知道夠錢畀自己到90歲過身都唔易,阿伯仲剩番咁多畀仔女,可以稱得上係一個成功的投資者。

        唔明股票唔去買

        大家不妨睇睇阿伯的投資經驗,有甚麼地方值得我哋參考同記取。首先係佢唔會買三四五六線、古靈精怪嘅股票。阿伯成日話,讀得書少,有好多嘢唔明,怕俾人滾,就唔會買古靈精怪嘅股票,只會買大公司股票,因為知佢哋做緊乜,中電發電、長實起樓、和黃做超市碼頭,隨口講得出。我聽到之後滴晒汗,一個啤膠工人同股神巴菲特講買股嘅方法,其實差唔多?巴菲特之所以唔買科網股,冇中招,原因就係佢唔識科網呢盤生意,所以就冇買。好多人想刀仔鋸大樹,買一博十,專買古靈精怪的股票,結果連刀仔都輸埋。

        第二點係專買藍籌大股,貪佢哋穩陣,唔會執笠。阿伯成日都問,呢間公司唔會執笠啩?可能係後生的時候見過銀行擠提,銀行執笠,話60年代恒生都試過擠提啦。所以對公司穩唔穩陣,特別小心,連銀行股都唔買。買股死坐最怕公司執,佢要避開可能執笠的大股。

        長揸連息都食埋

        第三點係肯長揸。呢個同佢買股想食息有關係。所以會揀比較高息的股票。和黃買咗之後,股價下跌,都冇所謂,可以坐吓,收吓息。見到升,都唔需要急着沽出。佢成日講,沽咗隻股票,都唔知買乜。長揸,就可以食到較大的累積升幅。

        自我控制最重要

        第四點同投資組合無關,但同人生觀有關,係量入為出。阿伯好早已經離開仔女,獨自生活,主要靠自己養活自己。雖然花費不多,但生活也算開心。財經報紙經常睇,但落注唔多,問佢睇咁多做乜,佢話可以知道世界發生乜事,可以知多啲,充實自己。其實,當你對世界發生嘅事知得愈多,愈了解,就愈想有行動,忍唔住在股場進進出出,控制唔到自己。至於阿伯點樣能夠知得多,買賣得少,點解咁忍得手就唔知啦,可能係怕買得多會輸唔夠錢生活,亂炒股都係一種花費。

        佢生活能夠做到量入為出,睇住有幾多股息收入,仔女會畀幾多茶錢,生果金有幾多,就使幾多錢。事實上,生活過得開心,又唔一定要豪花。最難得的是阿伯知道自己未來的生活係點。而好多人都沒有這個概念,無諗過退休以後,生活會係點過。

        《巴士的報》搞那個「巴士的退休資金計算機」,好多網友撳完之後大歎,點得呀,點可以累積到咁多錢夠退休呀,唔會成功嘅。我就舉一個無乜讀過書嘅啤膠工人成功故事畀大家睇睇,要做到財務自由,其實唔難。關鍵係知道自己要做啲乜,又肯去做,就雖不中,亦不遠矣。問題係好多人都唔肯去節制自己。

        不知道大家是否記得,幾年前有一名英國籍退休法官,因騙取綜援被控。當年佢在香港做法官,仲係老外,一年可以賺幾多錢?但點解退休後要住公屋,仲要呃綜援?錢去晒邊?唯一的解釋就係亂咁使錢啦。

        所以話,做唔做得到財務自由,退唔退到休,與讀幾多書、每月賺幾多錢無關。香港係資本主義社會,錢會搵錢,以資本累積資本容易,狂花錢損耗資本呀。

        陸羽仁

文章出處:
http://news.stheadline.com/dailynews/headline_news_detail_columnist.asp?id=283671&section_name=wtt&kw=4

一定令你退休不了的5件事(必睇文章)


假期外圍股市無乜大事,不如講吓退休歎世界。唔好以為退休呢個話題係長者的專利,自從陸羽仁現咗身之後,好多人見到我都問功課,最常見的問題係「陸生唔該你畀個冧巴我等我早啲退休啦。」唔好以為咁講的是中老年人,中老年人反而好忌諱退休呢個字,就係嗰啲30、40開口埋口都話退休。

        在一般人口中,「退休」是歎世界的同義詞,咁後生想退休,不外乎想唔使做可以日日玩,又確係唔少人的夢想,特別係你覺得自己個老闆又無能又屎仲要日日點你之時,更加想退休。所以退休係好多打工仔的夢想。

        叫得做夢想,即係多數無辦法實現的事情。點解無法實現,因為你缺錢,唔夠錢養自己過世。

        香港是全球壽命最高的城市(唔係因為空氣好,主要係有事送去醫院送得快),過80是等閒事,若是55歲退休,要養自己到80,即係要養25年,若兩公婆得一個人打工,兩個人使費雙計,等如養多50年,用做30年嘢所得,要養自己多25年或50年,要大體上維持現在的生活水平,你估又係唔係咁易?

        要退休 計計數

        為咗科學啲去回答「你夠唔夠錢退休?」呢個問題,我在《巴士的報》(www.bastillepost.com)搞咗個「巴士的退休資金計算機」(http://goo.gl/YUpxhk),你上去輸入資料,包括月薪、儲蓄比例、現有儲蓄等,選你的退休年齡,按一按個掣,就知道你夠唔夠錢退休,都幾好玩架。

        預告少少玩呢個計算機的結果,一般而言自然現有儲蓄高,儲蓄比例高的人易合格,但亦有不少朋友玩完發現,收入愈高、特別係高收入低儲蓄比例的人,最難退休。因為一般人都無諗自己退休後想點生活,但係個計算機就預設咗你退休後直至假設90歲歸天時,都一直維持以現時物價計你月薪50%作使費的生活水平,大家要注意呢個世界有通脹,現時物價水平的月薪50%,在30年後可能得番現在月薪20%的購買力,所以咁樣預一啲都唔多。

        想退休後大致能維持現時的生活,就一定要計數,睇吓夠唔夠。

        借卡數 輸一世

        若然你現時輸入資料後,計過夠數,唔等如你幾年後都夠數,因為幾年後touchwood講句,你突然輸咗大筆錢,或者突然有大筆開支(好似送仔女出國讀書),都可以令你由夠錢變成唔夠。

        若然你計完之後發覺唔夠,咁就要檢討吓出現咗乜嘢問題,早早解決,及早為10年、20年後退休打算。

        我從讀者、網友、朋友問我的問題中,總結出幾大類棘手難題,會令你唔夠錢無得退休。

        第一,使大咗。有個網友問我佢月入2萬,但欠緊40幾萬卡數,有間300萬自住樓,沽咗佢有100萬淨額,問我好唔好沽咗間樓還卡數。我的答案好簡單,盡一切辦法還清卡數,可以用間樓借二按還清卡數,當然亦可以賣樓找卡數,但以佢過去借咁大卡數的往績,我怕佢還完卡數攞住50幾萬在手,唔使幾年又花清或輸清。

        我唔知呢位朋友點解借咗同佢人工咁唔成比例的卡數,唔知佢知唔知借卡數要畀幾多利息?以一間本地大銀行的信用卡為例,實際年利率32.99至35.72厘,若持卡人在過去六個月內有2次或以上連最低還款額(Minpay)都找唔到,在第2次逾期還款後,欠帳實際年利率將上調至40.53厘,直到持卡人連續六個月再無逾期還款記錄才會還原。嘩,35厘、40厘?複式咁上,兩年多一點就翻一倍。

        如果你一開始借卡數都係做一啲超越咗你收入水平的消費,例如無收入的學生買部iPhone,OL買個幾萬銀手袋,低薪打工仔借30、40萬結婚,都好大鑊。

        留學生 大負擔

        過去有些網友借卡數炒股問我有乜好介紹,我話最好介紹就係先還清你所欠的卡數,有乜投資可以固定有35%回報?無。股神巴菲特都係一年10幾、20%回報,幾十年累積下來就變成世界首富,你欠卡數之後,十年、八年可以變窮光蛋。若你欠卡數多,最起碼借私人貸款去還卡數,因為私人貸款年利率由3厘幾到12厘不等,但點計都平過卡數好多。

        第二,送仔女出國。家送仔女出國係一個重大開支,小朋友去英國、美國、澳洲、加拿大讀書,40、50萬一年閒閒哋,如果初中就去讀,5、6年中學、加3年大學,隨時要400萬一個,咁唔好彩有兩件出國,就唔見800萬,要有800萬淨儲蓄,幾慳都等如千幾萬收入,即係好多人一世做工所得的儲蓄都畀晒仔女出國,有啲唔夠仲要加按自住樓去支持。結論係仔女出國好易窮,當然你係超高收入人士另計。

        但我發現送子女的父母不是以理性方式衡量,通常都只是以愛子女的心出發,甚至認為我市儈。

        我的理念係父母諗清楚自己傾盡所有畀仔女出國讀書,只要明白對自己未來的影響,都可以畀仔女去,但至少要話畀佢哋聽,爸媽好大犧牲送佢哋出國,叫佢哋要畀心機讀書,唔好浪費爸媽的苦心,一定要講。我見過好多公務員收入不高,但中一、二就送仔女去英國讀書(因為有少少津貼),但仔女無心向學,讀到中五、中七都讀唔上,大學都讀唔到就返來,真有「唔知想點」之歎。

        買貴樓供死會

        第三,買咗貴樓。另一個重大開支係高價買咗貴樓,買樓係重大投資,若是低價買樓,即使一般人低價時買200萬樓,可以產生以倍計的賺價。反之若買咗貴樓,就係極大負擔,可能孭多一兩百萬債,呢一兩百萬又係淨儲蓄,所以買貴樓都幾傷。我覺得樓價低時不妨多買,樓價高時盡量不買,你話家租樓貴,如果不大揀區,找供應多地區新入伙的樓盤,都可以租到較平的樓。

        第四,炒錯股。或者準確啲講,將大部份、甚至全部資金,投放在高風險的窩輪及細價股上。我經常講的方式是分開「投資的我」及「投機的我」,年過40者,「投機的我」所佔你組合的資金,不能超過50%,最好30%以下。

        年紀愈大,「投機的我」所佔的比例愈少,我唔會叫人唔投機,你炒開,唔炒會手痕,炒少一點金額就可以,輸咗唔傷身。你用100%資金做「投機的我」,同用30%資金做「投機的我」,好大分別,10年、20年後,用少啲錢投機,可能令你多100、200萬身家。

        買ELN中晒招

        第五,投錯資。你唔好以為我搞笑,剛剛同一個長輩吃飯,佢股票組合內的蟹貨,大部份係買「股票掛鈎證券」(ELN)而來,例如40幾元的國壽(2628),當日佢唔太清楚以為係收息產品,亦知道可能要收股票,但模模糊糊覺得收咗就揸吓。

        佢唔明買入ELN就等如沽出「認沽期權」,收取所謂利息其實是「期權金」,若到期時隻股低過設定價,ELN的持有人就要接貨,若佢明我估佢唔會買。

        我懷疑每當正股好高時,就有大量ELN湧出街,根本就有外資大戶手上有股票唔方便沽,就要買入大量「認沽期權」,去對沖手上持有股票的風險,咁就包裝成普通散戶都可以買的ELN,你買咗呢的東西,其實係同大戶對賭,好易輸。

        好多本身不愛冒險的投資者,買入一些包裝成收息產品的工具,正在參與沽出「認沽期權」呢個高風險遊戲而不自知。所以投資的最簡單方法,不如在大市跌得多時買入指數基金,在升番咁上下時沽出,好過買啲古靈精怪收息產品好多。

        上述五樣事情,少者可以令你唔見三幾十萬,多者可以令你唔見幾百萬,若你五樣都無做,一定可以令你比做咗呢啲錯事的人,早十年八年印印腳退休啦。

        陸羽仁

文章出處:
http://news.stheadline.com/dailynews/headline_news_detail_columnist.asp?id=282860&section_name=wtt&kw=4