2014年8月27日 星期三

一舖可養您三代,一鋪亦可輸您清袋!

一舖養三代,一鋪輸清袋!

2012/3/2 上午 01:02:42
網誌分類: 磚頭攻略

有 好多朋友睇完Ricky投資舖位分享之後都興致勃勃,手痕痕想買間舖嚟厚切或者長線持有,感受吓咩叫一舖養三代。但對入門投資者而言實在超易比上手業主厚 切繼而被迫長線持有(即坐艇)或損手離場,一舖輸您清袋。所以行動之前要停一停、諗一諗,諗清楚自己點解要買,小心貪字得個貧!

Ricky D文章係分享佢選擇舖位嘅思維,但好多讀者只係專注在買入賣出價,以為買舖必賺,急急欲試,其他內容嘢睇過就算,跟本冇去留意佢每一個磚頭項目嘅思維同心 路歷程。我耐唔屎都有同 Ricky吹下水,所以我所知的項目細節比文章內容提及的多,佢搜集資訊好鬼認真、勤奮同好有熱誠;佢嘅磚頭分析力同觸角都好鬼強;而最勁嘅係佢人際網 絡,收明風收暗風都比一般入門投資者多同快,而已出、入、租都有經紀網絡去支援。唔好只睇投資者賺幾多幾多,佢地背後負出咗幾多係睇唔到。又冇做功課又冇 網絡支援下隨便入貨贏面有幾高呢? 係唔係一買即賺長升不跌呢? 值得好好去思考!

投資舖位係好考眼光,買入一個高租值同高升值潛力嘅舖 位真係冇得輸,問題係點樣去判斷一個舖位真正租值同升值潛力價值呢? 靠估? 靠運? 靠Agent話抵買? 聽聞呢家嘢要好睇經驗同網絡。我見我D投資舖位朋友都係做咗好多功課先入市,而且買賣或出租舖位都有成Team經紀網絡支援。另外,我又成日諗...好嘅 舖位,業主會唔會咁易沽出? 以Ricky個大圍大大舊為例,佢打算長期持有,直至願景或外在因素改變先會考慮沽出。另另外,喺一線街好似廣東道一帶咁有自由行概念同願景嘅舖位,好多 業主都唔會放盤,即使放盤都係明天價! 再者,好多舖位投資者都係高手或高高手,要由高手手上接貨之後仲要跑贏大市真係咁容易? 我成日都覺得荀嘢唔會咁易落到自己手! 落到自己手多數都係有引號嘅"荀"嘢! 平時自己有咩益過D經紀呢? 咁經紀又點解要益我呢? 現階段最好都係企埋一邊睇吓朋友點玩學吓嘢先!

另外要提嘅係量力而為,唔好為買舖而買舖。2005年有位磚頭前輩話買舖要6%入4%出為 之安全,而打後幾年我見住佢用呢條formula成功安全出入咗兩件舖,前輩近兩年已冇咩大攪作,只保持強大購買力去等等等,立於不敗之地。據知依家一般 舖位投資者個pattern係4%入2.5%出,由回報率去睇呢幾年又已經升咗一大截。依家利息都算平,舖位按揭有機會~2.5%做得到,但銀行對舖位未 必批到太長年期按揭,即使有租收都好有可能會有負現金流情況出現;萬一租唔出或者租唔到2.5%,月月都要嘔突。持貨能力都好決定輸贏,假設你2005年 入貨,如果持有到依家一定執唔少,但有冇諗過一旦持貨能力唔夠,頂唔頂得過2008年金融海嘯呢? 嗰陣好多舖位商戶摺咗、走佬或要求減租,持貨能力唔夠強好易一鋪清袋! 舖位好蝦人玩,住宅衰極平市價小小一定會有人租,但經濟唔好時工商舖都會窄窄地,位置唔好或做唔到生意平都冇人租。如果只靠收租嚟供舖又冇儲備,一個浪已 經可以KO咗唔少小投資者! 

一舖可養您三代,一鋪亦可輸您清袋! 小心為上,唔好貪,祝君好運~!

沒有留言:

張貼留言