L型經濟股票難炒

金融High Tea——L型經濟 股票難炒

2015-07-27

      

過去十年，在六月尾、七月初買股，賺錢機會遠大過輸錢。今年會唔會例外，股民、專家睇法差唔多，唔少都對前景有保留。大家睇淡，原因有兩個；一個係資金流向；另一個係實體經濟表現。

        先講資金流向，呢個月美國公佈首次申請失業救濟人數，大幅下降2.6萬人至25.5萬，係1973年以來的最低水平。市場預期7月非農就業人數會增加至25.2萬人。另一個數字係新屋開建數字強勁攀升的推動，6月份領先經濟指標指數上漲0.6%，數字意味着下半年經濟前景仍然強勁。

        華爾街四連跌

        就業係聯儲局最重視的數據之一，失業率穩定向好，令到聯儲局能夠在今年內加息的條件大升。聯儲局主席耶倫近期多次放風，將於今年稍後時間開始加息。市場估計，聯儲局最早可於九月開始加息，加息甚至不止一次。

        不過，聯儲局職員啱啱擺咗個烏龍，將應該幾年後先解封的會議內容放上網，提及聯儲局內部對經濟睇法無外界預期咁樂觀，多位理事覺得美國今年最多加息一次，就已經差唔多，不似外界估計加咁多。可能受美息向上的心理預期影響，上周五的新屋銷售都比預期差，成為華爾街四連跌的理由之一。

        聯儲局議員有無咁烏龍，將咁敏感想法放錯上網，中環茶友大有保留，有人講笑話呢個可能係耶倫放風新招，等大家有加息預期。究竟烏龍係真抑或假，睇吓有無人「被炒魷」就知啦！

        茶友最近已經成日話，市場已經預咗美國今年會加息，市場已經慢慢預咗，所以利率上周好過唔郁，最正路係美國加兩次息，令利率正常番少少，然後再按實際情況決定未來仲加唔加，咁樣好過唔郁手，任由通脹升溫。佢認為，美國經濟仲未係大好，加上就快大選，為免經濟大幅波動和影響選舉，儲局一般係呢啲年頭唔會大力加息。儲局擺錯咗嘅會議紀錄，反映出嚟的想法都好大路。

        香港得番樓市撐住

        美國加息步伐漸近，華爾街情緒有點神經質兼緊張，美股上星期就借住部份公司業績唔係咁靚仔調整。杜指上周五收17568點，跌咗163點，全星期計就回落近3%，反覆去到近期低位，顯示華爾街股民開始為利率上調做好準備。

        至於另一個因素，就係實體經濟表現，講到呢瓣就內地同香港都較美國值得擔心。上周五公佈的7月份中國製造業指數（PMI）創出5個月新低。消息公佈後，A股倒插收場，港股急跌287點，美國預託證券開市繼續回落，加此華爾街低收，相信本周開市氣氛仍然緊張。

        陸羽仁最近同唔同嘅商界人士傾起，大家覺得中港商業周期喺高位運行，正等緊有乜嘢觸發一場明顯啲嘅調整。有本地零售業巨頭講，佢喺世界各地都有生意，依家美國同歐洲都算係平穩，反而喺香港仲係尋緊底。奢侈品零售淡靜已經係不爭事實，遊客區租金向下調整成為大勢，就算係水貨客買開的類別，依家都放緩咗。

        比較好彩係樓市同樓價仲挺住，支撐咗本地消費，若然樓價放緩，情況會點就真係好難講啦。啱啱開售嘅一個房協長沙灣樓盤，因為訂價低過同系二手，吸引大批買家捧場，幾百個單位一Q清袋。雖然係咁，唔好忘記樓市氣氛可以變得好快，尤其依家樓價高企，交投減少，有點乾升味道，如果美息向上，買家熱情多多少少都會受考驗。

        巨頭覺得市道靜咗有兩個原因，一係內地進行緊調整，加上打貪因素，影響了消費力；另外，美國息口開始有向上跡象，美元轉強，令不少內地人同外地遊客減少來港消費，之前本地有一班人大聲嘈，不歡迎內地人前來消費，只係壓斷駱駝背的最後一根稻草，就算無呢類事件，相信市道都難逃一跌。

        佢仲笑言，日前遊客區發生單萬元一支藥油的劏客風波，可能反映部份業界心態。以前生意好做，無謂鋌做到咁離譜而走險，依家斬埋唔夠一碟，於是狠下心腸斬客喎。呢種講法多少有搵藉口之嫌，但零售業由高峰回落，但人工、租金未回調，老闆們捱板都唔容易確係事實，喺咁環境下，零售股業績唔會好。通常零售業最大成本係人工同租金，依家租金開始調整，但幅度未係好明顯，薪酬同樣仲未跌，所以零售股雖然調整咗唔少，想撈底低買唔使咁心急住。

        香港零售或旅遊業，基本上只係小氣候，大氣候始終係美息同內地經濟，內地PMI咁差，好多人都有小小意外。早前內地話上半年增長成功保七，有人從相反角度解讀，話阿爺咁緊張，係咪數據好差呢？從公佈公來的PMI睇，內地似乎仲未捱過最惡劣狀況，未來可能係有反覆的日子。

        有茶友喺外地回港，佢話依家係美加，開始見到不少美國本土生產同東南亞生產的消費品，佢估係因為人民幣升值同內地抄咗德國勞工法例，年年提高工人福利，增加嘅生產成本的效果慢慢浮現出來，若然係咁，內地喺未搵到另一個經濟火車頭之前，要維持7%的增長真係好唔容易。

        內地最驚通脹夾擊

        早兩個月，實體經濟差，市場憧憬中央會放水，令壞消息可以從利好角度解讀。不過，呢個「傳統智慧」仲有無效，依家就要小心觀察。內地放水的解讀有可能出現新變化的原因有兩個，一個係通脹會唔會重燃，若放水太急會觸發滯脹憂慮；二係A股爆災後，市場對大水浮起股市的信心係咪仲係一樣。

        上個星期，市場忽然炒起豬肉股，陸羽仁當時講過要留意會唔會係通脹威脅？燈號亮起。其後發現市場都有唔少人抱相同睇法。內地通脹數字，食品佔相當權重，其中豬肉係重要數據，肉價漲對數字有推動作用，要留意是豬肉漲價的代表性有幾強。

        前幾年，豬肉都試過急漲，令農民大量養豬，搞到豬年豬肉過剩，連長江都爆發死豬成災的事故，之後養豬的農民減少，可能是肉價上漲的成因，若然只是生產循環的因素，咁就無咁驚嚇。現階段比較理性的做法是不下結論住，但就提高警覺性，因為若然通脹升溫，阿爺唔敢亂放水，咁等如綁住雙手去救火，好難去托住經濟同個市。

        依家內地經濟界已經確認，中國經濟無U形反彈，似係L型在底部橫行，情況唔太樂觀。經濟差係壞消息定好消息，好大程度取決於阿爺有無同用乜措施去應對。但阿爺似乎要等通脹回番才可出重手放水救市。

        野村證券預測，今年下半年中國央行還會有一次降準，一次降息，約為25個基點。就算中央有減息降準機會，外界反應都未必一樣，尤其係經過A股暴跌，有中國好友之稱的對沖基金BridgewaterAssociates負責人RayDalio早前發信俾客戶，坦言「我們對中國的看法已改變」，因為內地股市泡沫急促累積和爆得這樣快。經此一役，相信好多人傾向持有現金。

        炒中短線要提高警惕

        連大好友都咁講，中港股市現時雖已有咗啲調整，估值唔算太貴，但考慮到實體經濟氣氛影響，加上信心未復，若然只係諗住撈住撈貨炒炒中短線，就不能不對短期波動增加警惕。

        陸羽仁