樓市跌市前有先兆

最近股市大跌，很多人在討論，幾時到樓市跌？
樓市大跌前，總有凶兆！
筆者睇過不少有關文章分析，聽過不少前輩分享，例如股市大跌、供應大增、新樓劈價、回報大跌、銀根短缺等，逐一分享...（一）股市大跌
前輩教落，股市與樓市息息相關，一般來說，股市比樓市行快三個月至半年，例如 2008 年金融海嘯，股市在 2007 年底見頂回落，筆者仍未醒覺，2008 年中樓市崩潰，筆者深受教訓！今次股市大跌會唔會又引致樓市大跌呢？筆者覺得而家言之尚早，要睇佢跌幾多，跌到幾時，照睇今次跌浪，純粹因為四月中央高調炒高股市，升勢過急，妖股當道，幾蚊炒上百幾蚊，再跌番落十幾蚊都夠膽死，食到咁滯，清清腸胃理所當然！
不過升勢過急亦有好處，一般散戶跟唔切，冇好似中國大媽咁瞓晒身，香港股民損失有限，反映到樓市上，大部份業主叫價會收斂，不過受惠於 SSD 冇供應，唔會劈得太多。買家亦唔會太進取搶貨，睇今期居屋銷情就知，會有不少減價盤，之前個個叫高一成，而家殺低一成，一來一回相差兩成，唔少嘢！想買樓就要留意啦！

（二）新樓劈價
二手業主企硬？新樓發展商唔同你顛！1997 年到 2003 年期間，新樓價錢仲平過二手，拖冧成個樓市。近年曾經見過這種情況，例如去年靜市推出的馬鞍山迎海一期、九龍西丰匯等，所以當時樓價調整亦較為明顯，筆者當時在旺角買了三間，同學、同事買得更瘋，至今回報以百萬計。然而最近新盤又開始進取，尤其是細單位，例如長沙灣曉悅、土瓜灣傲形、旺角 Sky Park 等等，都比區內二手樓高很多，最誇張的當然是何文田天鑄。只要一手沒有大幅劈價，壓力不大。

（三）銀行收水
睇番 1997、2008 兩次大調整，銀行取態對樓市影響似乎最大，尤其是 2008 年，筆者有朋友曾經還過，明明已經批出咗按揭，成交之前幾日，忽然間話唔借俾你，最後要搵財仔，亦有朋友選擇撻訂，形勢凶險。記得當時的銀行估價，總比市場成交價低，明明做緊 400 萬，銀行就估 360 萬，都是收水跡象。現時銀行估價進取，加上多年來不斷收緊按揭，又搞乜鬼壓力測試，銀行似乎唔似收水。

（四）租金急跌
2008 年的時候，不但樓價大跌，租金亦大跌。記得當時筆者有 5 個租客，兩個打電話來話公司裁員，唔租，一個打電話來屈減租，原本 6,500 租金的單位，最後要減到 5,200 才能租出，非常恐佈。幸好當時筆者的物業都是上車盤，仍然夠供樓，不至斬倉。前輩分享 1997 年的時候，租 8000 元的單位，供樓要 18,000 元，真係想唔斬倉都唔得。雖然現時租金仍然企穩，然而隨着大陸學生減少，反大陸遊客打擊各行各業，經濟下行似乎無可避免，去年暑假，租金狂升，今年暑假，就算不見，可以預期租金將會調整，大家要留意啊！