狂掃巨型A股護盤

傳聞希臘長毛、總理齊普拉斯軟化接受債權人建議，外圍股市反彈。歐洲央行同希臘鬥大，瑞典央行未等到結果揭盅，突然宣佈將指標回購利率下調10點子，至負0.35厘，將國債購買規模擴至450億瑞典克朗，反映歐羅區已經預咗長毛「發爛渣」，要放水應變。

        無論如何，在歐美股市大反彈下，港股相對就硬淨番啲，上證綜指全日下插，港股都叫頂得住。

        阿爺前晚都唔係瞓覺，連交出三招，第一招係取消孖展融資的擔保比例低於130%必須「補倉」至150%的規定，第二招係增加證券商融資渠道，第三招係由8月起調低交易經手費30%。可惜阿爺咁出手都頂唔得耐，內地股市先升後瀉，上證指數午後曾大插6.4%，跌穿6月30日低位3847點，失守3800關，一度低見3795點，真係嚇到股民面都青埋。

        神秘資金隊高巨股

        但

兩點半市況最差時神秘資金入場，狂買巨股，將四大巨股硬生生抽咗上去，結果在大跌市，中石油A股大升8.8%，中石化A股大升5.6%，工商銀行A股大升5.8%，建設銀行A股大升3.9%。咁樣買法，只能解釋為無形之手入市，不問價買起權重股護盤，硬生生撐番高大市3%，令滬深兩市尾市跌幅收窄，上證最終跌近3.5%，勉強守在3900點上收市。我估呢啲神秘資金，九成九都係國家隊啦。

        收市後，騰訊財經引述知情人士報道，中證監正向多個機構徵求救市方案，中證監救市仍留有後手。知情人士未透露徵求意見設計的機構範圍和具體形式。內地係想股市做慢牛，唔係想佢做死牛，��家個市喺4000點度打緊攻防戰，估計阿爺會繼續有招出。

        A股壓力未除，曾波及恒指一度倒跌115點，低見26135點。午後內地股市跌勢加劇，最終僅微升收市，但港股已經算叻啦。恒生指數收造26282點，升32點；國企指數收報12784點，跌196點，跌幅1.5%，香港國指無人護盤都跌咁多，港股都算樂觀。大市成交1508.5億元，估計短期個市仲會受內地市況牽引。阿爺打緊硬仗，未來幾日係生死肉搏期。

        澳門6月博彩收入雖然下跌36%，但當地政府增加內地旅客過境逗留天數至七日，刺激濠賭股爆升。金沙（1928）大升3.15元，造29.25元；銀河娛樂（027）飆4.1元或13.27%，造35元，金沙與銀娛為升幅最大藍籌股，但佢彈得咁急主要係之前累積升幅太多，唔排除彈咗就完。

        另外，萬達商業（3699）錄得大手上板，傳遭平保（2318）沽貨，萬達收挫4.25元，收58.1元，是包尾國企成份股，平保跌2.8元或2.67%，報101.9元。

        深圳概念股開始有動作

        下半年市場焦點之一係深港通幾時開通。有中環茶友話，深圳近年大搞高科技同金融，與其到時追貨，都可以發掘吓有乜深圳概念股買吓。昨日深圳國際（152）及深圳高速（548）宣佈，兩間最近已與深圳市國土委訂立土地出讓合同，據此，項目公司已按原定計劃於六月三十日前簽署土地出讓合同及支付30%之地價款，並已獲取梅林關地塊的土地使用權。地價款總額35.67億人民幣當中的30%，已於六月三十日前繳納，餘款將於2016年6月30日前繳納。

        深圳��家土地供應都相當緊張，主要係特區面積總面積唔夠兩千平方公里，常住人口有千幾萬，所以未來都會不斷發掘土地資源，好似深高速的地皮就係重新規劃使用，喺土地重新發展下，深高速今年股價都一度大升。

        陸羽仁