90年代買浩劫灣的血淚史

買樓摸頂？！「浩劫灣」業主專訪

同學阿包分享 97 摸頂買樓的慘痛經歷...
阿包跟筆者同在西環長大，特別投契，九十年初踏足社會，從事 IT 工作，當年互聯網剛剛起步，阿包雖然沒有唸大學，但在商科學院修讀電腦的他，仍然可以晉身大公司，人工不俗。回歸前夕，阿包準備結婚，當時樓市炒得火熱，他想自住之餘兼賺番筆，於是就跟大隊去買當時一個矚目新盤－青衣的「顥景灣」。收鎖匙後不久，樓市急轉直下，高溢價的新盤「顥景灣」更是重災區，更被人灌以「浩劫灣」的惡名。1997 年阿包以接近 $450 萬，買入一個約 540 呎實用的單位，2003 年同類單位一度跌至 $180 萬，跌了 60%...
Picture
咁多年來最辛苦係咩？
「主要係眼紅人哋點解 $180 萬買到啫，其實樓價升跌影響真係唔大，我自己住之嘛。」阿包說話挺坦白：「最慘其實係供樓，詳細我唔係記得好清楚，當年上會按息大約是 11%，我借盡九成，做 20 年按揭，每個月供四萬幾！同樣的單位，月租只係萬幾！不過又唔算捱咗好耐，好似科網股爆嗰陣，利息跌到去 7% 左右，我同銀行傾叫佢減俾我，再過一、兩年，利息跌到落去 3% 左右，我直頭轉去第二間銀行，再拉長嚟供，每個供兩萬幾，不過同期租金跌到七、八千咋，好在我夠勤力，最差時候都冇俾人裁員，頂得住，哈哈！」

有冇後悔當年買樓？
「話冇就呃你啦！如果我响 2003 年買，發咗啦！不過諗落又唔可以咁講，問十個香港人，十個都後悔 2003 冇買樓，邊個估到呢十年升得咁勁？」阿包剖白當年決定：「當年為乜買樓？咩結婚需要，其實係自己貪心想賺番筆！應該好似你咁講，計清楚嗰期租抵定買抵，租金可唔可以冚到供款先決定，咁就安全好多啦！金融海嘯之後，通街做 Hibor，我又走去轉按，而家供緊 1%，Keep 番供 20 年，每個月供兩萬都唔使，如果要租？而家呢度租成萬六！」

之後有咩打算？
「而家又唔擔心啦，早兩年樓價返晒家鄉，再加上我差唔多供完啦，如果而家賣出去，我可以有成 $500 萬 Cash 响手，好似你咁一開二，整番間收吓租都仲得！有咩筍盤介紹先？」阿包越來越識計數：「雖然俾人笑浩劫灣，不過點都好過冇買樓！呢廿年嚟，唔止有地方住，仲儲咗 $500 萬喎！講真如果我唔係買咗層樓，邊可能儲到 $500 萬？肯定洗晒！或者學人炒股票，輸鬼晒！當然如果買得準，贏得仲勁啦！」

臨走的時候，阿包不忘提醒 Anthony...
「講真架...跟你去買樓呀，我真係諗住賣咗層樓，一開二架，兩間三百萬左右，一間做九成自住，一間做五成收租，好似一開三都得喎，係咪呢？」筆者對阿包的情況亦充滿信心：「得！你賣咗先講，筍盤一定有，唔使急，到時幫你計計數，計到唔使錢有樓住，住番「浩劫灣」都得！答謝你分享浩劫實錄！」