阿爺睇大 細股受災

金融High Tea——阿爺睇大 細股受災

2015-07-08

      

中央出重拳救市，都搞唔清係阿爺鬥炒手，抑或係阿爺鬥大媽。但外觀睇到大媽已經嚇破膽，在跌市散水人踩人，阿爺救市表面穩住大局，上證指數只係跌1.3%，但大媽四方八面咁要逃出失火的戲院，中央頂得大股嚟，就到股仔失救，睇睇內地中證500指數大跌6.5%，香港國指都碌低3.3%，就可見一斑啦。

        國指破位大勢入熊

        阿爺玩暴力，狂推救市措施，牌面睇上證綜指昨先大插後反彈，收報3727點，跌1.3%，叫做守住3700點大關。但阿爺保護罩主要係集中大盤股，其他細股紛紛失守。周一中央四方八面嘅錢入市，收市後說法是證券商集資的1200億資金，唔係證券商自己操盤，集中由證金公司操盤，但周一用了57.3億元，睇佢入市手法集中托大股同埋時停時買，用咁少錢都唔出奇，所以計埋昨日，可能用了銀彈都唔係咁多。

        中央咁樣「聰明式救市」，當然可以玩長好多，救一個月都未必要再集資，咁救法好處係明托實不托，不斷釋放沽貨壓力任你跌。但咁聰明唔太暴力式救市，集中救大唔救細，搞到中小股繼續標血，屍橫遍野，控唔控制到金融風險，尚待觀察。

        睇香港國企指數，昨日插咗3.3%，幅度遠大於上證綜指，反映無阿爺護航嘅股份跌得慘好多，好多股份失禁式下跌後，部份已跌回起步點，甚至有啲瀉穿低位，災情慘重。如果睇番個圖，國企指數周一開始穿12500點破位向下，跌穿上升軌，俾多一日佢睇吓升唔升番上去，結果昨日不升反而再大插，正式確認穿上升軌，熊味十足。國指5月高位14962點，昨日低位11763點，跌咗21.4%，同樣符合西方跌20%入熊的指標。

        陸羽仁係「間尺圖表派」，化繁為簡睇住大指數條上升軌做人，見到國指穿位，恒指也同樣在周一穿位，就相信大市入熊。大市形成一個下降之勢，當然內地個市定番少少時，應該會有較大反彈，但對大市態度轉審慎。我對中國長遠經濟仍有信心，但覺得搞一鑊好傷要先休養一輪。

        本來無嘢搞出個禍

        我認為阿爺宏觀大局本來有利股市，放水又未完，但財金官員管理股市的技術幾差吓，在上證升穿4000點時無管理好風險，容許場外融資（即孖展）急促擴大，到升穿5000點時又急急去搞，搞到出事，初時又未有足夠重視，防止風波擴散不力，結果搞出一個禍出來。呢場風波原來可以避免，有少少人為搞壞咗，中央財金官員搞金融火候未到，還需補課。

        內地股市點樣好睇政策後向，香港經歷過唔少次股災，做過幾次火後鳳凰，而且港股結構同內地唔一樣，資金來源比較多源化。呢期A股湧上，香港升得慢、跌得快，反映維多利亞港真係港闊水深，吞吐量大，呢次又面臨大潮考驗。

        經過呢次大跌，短期上市要放慢。經此一役，內地股市吸取經驗，相信要唞唞但唔係玩完，香港亦證明到本身的實力。港股無內地股市炒得咁癲，股民無跌得咁傷，相信復原能力會強啲，西諺有講，每片雲都有條銀邊，所以投資者短期要審慎，唔好太快覺得乜事都無，要識得睇住倉位自我保護，中長期就唔使覺得地球已經停轉。

        陸羽仁