IBond 2015

人有人運，股有股運，投資產品有時都要揀吓出世時間。股市呢排處於休整期，政府推出通脹債券IBOND，吸引大批市民認購，有銀行職員話今年排隊嘅人多過上年，估計今年一人可能只得一、兩手，實際情況要睇真正認購市民有多少。

        買股嚇親寧願穩陣

        買IBOND變潮流，有人問好唔好認購，呢啲政府嘢實唔會輸錢，你唔怕麻煩都會有粒糖，不過，IBOND唔係股票，升極有個譜，加上分派有限，如果滿足執一千幾百，咁咪認購囉。

        坦白講，如果佢喺兩個月前推出，肯定無乜人理佢，因為個時炒股郁吓執幾十個巴仙，美國又話加息，不利通脹敏感的債券。點知自從A股風暴，好多人知道股市專收叻仔，早排贏得多，跌市仲輸得多，大家風險胃納急降，加上早日大陸豬肉價又話急升，於是IBOND變番有啲睇頭，依家俾傳媒炒熱咗，仲變成唔買好似有啲老襯咁。

        中環茶友中，有IBOND忠實支持者，次次佢都有認購，今年佢仲未郁手。

        茶友話，買呢隻政府債券，最和味係第一次，當時無人識好嘢，佢大手少少入貨，一中就中到滿額，分咗四十幾手，若然掛牌即沽就執幾萬銀，不過佢唔等錢使，擺喺度擺到贖回，賺足咁多年息。

        第

一鋪爆冷食了胡，第二年開始就多人認購，分配金額大跌，但既然係政府分糖，市民應得嘅，茶友交足稅，但無點攞福利，就算小小哋着數佢都年年買。

        茶友話，由於政府斟掂銀行唔收手續費，認購起碼唔使花佣。要留意係IBOND唔係用按比例分派，認得多唔等於派得多，以現時形勢，估計申請三幾萬已經分到盡，所以唔需要入大飛啦。

        一沙一石見世界，投資市場都係咁。茶友話，從IBOND咁多人買，可見公眾做事好情緒化，喜歡一窩蜂，依家大家突然愛上低風險、低回報的產品，係市場喺早前大幅波動市的集體心理反射。從呢個現象睇，心態弱的投資者，好多已經減磅或者避險，咁對後市反而唔係壞事。

        港股似叉唔夠電

        依家市場關注係內地股市震盪後點樣收拾殘局，同時美國有可能加息，令到市場觀望氣氛濃厚。依家恒指兩萬五千點，睇落唔係太平，但個別股份都算抵買。如果人心虛怯，個市有機會插低，屆時可能買到又平又靚的優質貨，咁比起爭買IBOND，計落可能仲着數。

        昨日人行繼續「放水」，再推逆回購350億人民幣，帶挈港股止跌回穩，一度升過兩百點，尾市回順，在25400點徘徊。恒生指數收造25398點，升116點；國企指數收報11834點，升100點，成交縮至798億元。

        內地股市升2.4%，國指只升0.9%，香港好似叉電叉唔起咁款，升唔跟足就怕佢跟跌。

        藍籌以今日公佈中績的友邦（1299）至叻，貢獻40點升幅，收造51.45元，升1.1元或2.19%。李寧（2331）獲高盛調高評級，由原先「中性」升至「買入」，因估值可撐起股價，目標價4元，收市報3.78元，升近10%。

        市場繼續升平股，借住環渤海動力煤價格持續低企，水泥股受追捧。海螺水泥（914）飆近7%，造26.1元，為表現最叻國企指數成份股；中國建材（3323）漲3%，不過呢排資金炒作一浸浸，如果見佢升先追入，可能已經遲咗，平股如果無乜古仔，炒兩炒可能就會靜番落嚟。

        軍工股反而睇落襟玩啲，昨日再次起動。航天控股（031）、航天萬源（1185）齊齊急揚10%；中航國際控股（161）升5.7%，造6.45元。