2015年6月17日 星期三

市唔怕你跌,最怕無錢

借住希臘有可能脫歐,美股低收過百點,跟住內地股市都跌,上證綜指繼續大波動本色,急促向下,再度跌穿5000點,喺咁環境下,港股自然無運行,尤其一啲紅色大股,都插得幾犀利,個別藍籌跌番到起步點,「六絕市」宿命暫時未能打破。

        本周內地新股蜂擁上市,估計凍資6萬億人民幣史上最勁,加上深港通或推遲通車,觸發內地股市急挫,上證指數曾跌4.4%,創業板指數一度插近6%,尾市跌勢放緩,上證指數失守4900關,跌3.5%,連跌兩日,累挫5.4%。A股急回調,內地證券股都跌得急,廣發證券(1776)H股就創掛牌後新低,收22.75元,雖然仍比上市價18.85元高,但若然高追要捱棍。

        美國聯儲局今周開會,對9月份加息會有明確啟示,市場預期息口上調機會增加,全球資金都做定準備,所以就算A股唔係咁多跟外資玩,呢個星期都有啲腳軟,香港仲要捱政改呢一關,恒生指數難逃再跌,創出兩個月低點,收造26566點,挫295點;國企指數收報13252點,瀉369點,成交增至1231億元。

        議息期近資金腳軟

        唔

少讀者問我買得未,我話個市未跌完,睇你手上現金多唔多,有一個有9成現金,我話開始買少少唔拘,另一個得1成現金,我就話可以睇睇,呢啲情況「唔怕市跌,最怕無錢」。我在微信群組見到不少內地朋友話自己「滿倉踏空」,成手貨無餘錢遇上跌市,其痛可知。所以,?家入市撈貨,就要有捱價準備,分注慢慢吸納。

        勁跌大股惹眼份子係中車(1766)。內地財新網引述中國鐵路工程總公司人士報道,今年第一次動車組招標或於下半年進行,目前計劃採購190列動車,可惜好消息反而惹來出貨。合併後的中車弱勢持續,旗下南車時代電氣(3898)都跌近7%,其他鐵路基建股齊齊捱沽。

        中車遇上長沙股民買佢輸到跳樓,變成跳樓股,本來已經弱,再踫到摩根士丹利魔笛唱衰,股價午後沽壓未止,重創10.4%,收報11.04元。

        大摩認為,合併後的中車獲得的本土新定單比預計略慢,加上按現時估值計算,其估值比同業溢價77%,評級由「中性」降至「減持」,目標價9.8元不變,折合17.6倍預期今年市盈率。

        中車運滯暫未宜掂

        鐵路股係A股大時代比較早就熱炒的股份,外資一早就話佢超貴,但內地熱錢不斷舞高,中車合併前H股由去年橫行位7元,剷上20.65元水平,但比起A股仲差一大截,A股由去年橫行位6元不到,升到35元,高低差幅更勁,當呢個板塊喺內地調整,H股亦不斷下插,?家由高位調整了差不多四成,應了一句升得多,跌得勁。由中車A股走勢都跌得「甘」去睇,摩笛威力咁大,唔多唔少有趁內資沽貨出招,趁你病、攞你命。中車咁運滯,依家平股又好多,雖然跌得多會彈,但暫時都唔想掂佢。

        基本上,外資上半年基本上睇淡內地經濟,六月份好多集資配股,都唔見老外掃貨。不過,富達國際投資股票部環球投資總監DominicRossi喺記者會就話,中國經濟增長正在減弱,上半年數據令人失望,但僅屬暫時性,相信內地政府將可調控其經濟軟着陸。

        呢排另一個市場關注係內地電力部門執位,國資委公佈國家電力投資集團公司職務變動情況,外界談論最多係成員名單中無李小琳。國家電力投資集團公司是由中國電力投資集團與國家核電技術公司5月29日正式宣佈合併成立的,李小琳榜上無名,令人關注呢位中國電后的動向。

        陸羽仁

沒有留言:

張貼留言