上文周五下午，恒指突然發難，一小時內喪升超過550點至27918點，勁升632點，收市升幅略為收窄，仍然大升536點，升幅2%。當日港股特別的地方，在於滬市同日下跌1.6%，恒指卻朝相反方向大幅走上，即使比較跟內地走勢的國指也逆向漲1.7%，雖然國指跟唔足恒指升幅，也擺脫跟隨內地股市下跌的命運。
導致港股大升的原因，表面看是市場傳出深港通很快將會開通，甚至會於星期日便有公佈，令大量跟風者追入炒上。深港通是必然會發生的事件，此前曾經傳過5月開通，所以在5月份之內，這個消息還會反覆炒作；不過，要慎防這個預知的好消息會成為夾上的藉口，借此大殺淡倉。
借深港通大殺淡倉
總之，大市仍屬牛市，大勢向好，基本策略是在大市回落的時候，慢慢吸納，期待下波再上時，衝破高位。
大
市上周由低位反彈2.3%，好似好多，相對於細股而言，咁嘅升幅，認真無味道。上周五，有21控股（1003）公佈有好多內地演藝界猛人落搭，獲一班猛人成為股東，包括機管局候任主席蘇澤光、內地導演徐崢及寧浩等，瑞東集團（376）本來和這交易有關，後來馬雲披露已收購瑞東81%股權後，交易又變埋同馬雲有關，因為瑞東認購了21控股1.7%，加上原有持股，佔股增至3%。沾到馬雲邊，隻股更好炒。
21控股停牌前已大升，股價復牌後高開15.6%至5.1元，隨後再抽高至6.8元，大升54%，之後雖然跳水回吐，收市仍有近11%進帳，收4.88元。
周末與一班中環茶友灌水，提到21控股。在座一位茶友舉手話買咗呢隻股票，呢位茶友係股壇老雀，買股很少買這種細股，主力長線揸大股。即使買細股，都是小注買一些行業落後股份，買了之後放埋一邊，等個三、五年，博股價可以翻身。
茶友話21控股前身是中小型地產代理股，2003年沙士後地產市道很差，茶友見股價急插，便投資了10萬元，小注玩吓。聽到這裏，一眾茶友連忙大聲恭賀，話該茶友買中馬雲股，1個月前股價還是1元左右，之後大升，到上周五爆升至4.88元，一定賺了不少，要請大家飲茶啦。誰知該茶友「喊苦喊忽」，話21控股係佢少數買股「瀨嘢」事件，跟住講咗一個極其慘痛的故事。
蚊型炒股供到無命
原本係做地產代理嘅21控股，公司本業衰落後，控制權轉咗手，茶友本來打算將啲股票放埋一邊就算啦，點知隻股呢幾年多次合併股份兼供股，搞到亂晒大龍。首先係2007年12月，20合1，跟手1股供3股，每股供股價0.038元；2009年12月，又1供4，供股價0.1元；到2010年12月，又20合1，再1供10，每股供股價0.19元；2011年，10合1，1供8，供股價0.1元。如是者，停了幾年，到去年4月，終於又再供股，5股供1股，每股0.5元。
隻股合併，不停供股，茶友開始時也有跟去供股，佢已經係老股民，開始跟去供股時條氣唔順，覺得隻股還有價值。但供了一兩次之後，已經面青。原本以為細細注，只佔投資組合的1%，結果跟一兩次供股，原本投資10萬元，變成了投資20幾萬元，佢只能停手不再跟供，佢心想幕後黑手在暗，股東在明，咁供落去唔係辦法，只能放棄不再跟供了。
供股攤薄收乾貨源
幕後人供股收貨的方式好簡單，大量發新股，你唔供佢供，假設原來有20%股票在街外人手上，大量發新股後，這些街貨股份就縮到2%，甚至0.2%！變成微不足道。
茶友手上的21控股，經過連番供供合合之後，股票總值卻跌到只剩幾百元，沽貨手續費都要過百元，睇見眼冤。即使依家升了4倍，都係值2000大洋，只係投入金額共20幾萬的百分之一！接近輸清。茶友話，這是他買股以來，少有的老貓燒鬚事件，叫陸羽仁一定要寫出來同股民分享。
可以喪升可以輸清
今天，很多人見到21控股這種股仔炒上，好多都變成10倍股，非常興奮。但當中究竟埋藏了幾多血淚史，卻沒有人留意。同一隻股仔可以升10倍，也可以跌到渣都無！固然，我唔會叫大家在牛市時「不如歸去」，不過，要買股仔，做「投機的我」，就要做好可能發達、也可能輸清的心理準備，先至好參與。
我對茶友講，我較少講冧巴，即使講到一些投機股份，都係較大隻的炒股，好少講那些會一倍一倍咁升的細股，唔會令人發達，亦可以避免輸清。因為我今天講咗隻炒股，炒完幾個月後下跌，我假設你輸10%會止蝕，但有些初入股場的新仔不識止蝕，當年買入21控股這類股份，就會輸光，所以唔好怪我唔介紹啲喪升股畀你。
高盛看好揸中資股
另外睇睇外資動態，亞太區股市近期回調，高盛上周五發表策略報告，睇好亞太區股市，指今年下半年將會進一步上揚，預計亞太股市今年每股盈利增長6%，2016年增長可達11%。
亞太股市當中，高盛建議投資者增持中國股票，主要原因係資金流動性充足，預測人民銀行仲會再減息0.25厘，以及降低銀行存準金率50至75個基點。另外，內地會推出地方債置換等措施，以減低銀行資產負債表的風險。再者，預計深港通亦即將出台，亦有利中國股票。
高盛話機構投資者將會建倉，建議建倉時關注近期股價落後，而基本面強勁的股份，例如中信證券（6030）、中信股份（267）、農行（1288）、華晨中國（1114）及瑞聲科技（2018）。
高盛另外建議買入的中國股票共有9隻，有兩隻在美國上市，包括阿里巴巴及百度；其餘7隻在香港上市，包括中移動（941）、建行（939）、中行（3988）、平安保險（2318）、國壽（2628）、中信銀行（998）及中交建設（1800）。
但在另一份報告中，高盛對內險股有更具體的看法，指大多數內險股的業務增長及回報，已經重返2008年至2010年水平，估值卻出現巨大折讓，顯示長線投資內險股，甚有吸引力。
高盛指，內地寬鬆貨幣環境，對保險業有利，首季業績優秀，由第二季開始，保險業加強代理渠道銷售保障性產品，預期表現將會更好，高盛預期今年至2017年，內險業新業務平均增長率達19%至21%，當中特別睇好平保，預測增幅會達到23%至26%，跑贏同行。高盛全線調高內險股目標價，其中將平保納入確信買入名單，取代國壽。此外，高盛認為人保（1339）股價近期已經升得太多，估值偏高，建議投資者將換馬至財險（2328）。
總的而言，外資此前一直睇淡中資股，所以內地股市大升，國指跟唔上，市盈率不高，現時高盛吹雞睇好。估計未來將會有更多外資轉軚買入中資股，隨着中國繼續放水，牛市唔會咁快玩完。
陸羽仁
沒有留言:
張貼留言