投資靠累積

美國雖然有聯儲局成員放風，9月份美國有機會加息，仲話今年可能加息兩次，美股仍然高升幾十點，納指仲創咗新高。港股就跟住中美股市走，出現四連升。

        識得累積先能錢搵錢

        A股一輪震盪，開始有人趁低吸納，滬股通前日就見到流入增多。中環茶友講起，話上周監管機構要加強規範「兩融」，跟住又傳有人炒中車孖展炒到跳樓，搞到內地股市急插。呢兩日又話，輸孖展輸到無命，只係網上流言，事緣湖南長沙有人自殺，咁啱又有股民炒輸中車，係輸錢的網民在網上哭「股喪」話要跳樓，結果就搞出股民輸到要自殺的說法。

        無論內地有無股民輸命呢單嘢都好，投資係保本增值，要長線累積，等資金愈滾愈大，太過搏命瞓身投資，一朝發達、一朝破產，絕對唔係辦法，我成日講資金要分清「投資的我」抑或「投機的我」，大份的資金要用來做「投資的我」，小量資金可用來做「投機的我」增加回報。唔好睇保本增值好似效果好慢，因為穩定增長回報係拋物線式上升，當你本錢大咗，回報就加快，不斷咁加速，變成錢搵錢，而炒作可能三更窮五更富積唔到錢，所以大陸股民輸孖展呢類故仔唔理真假，都有警世作用。

        經

過呢輪A股回調，依家市場唔止好多人賭A股見咗底，更多咗人看好H股前景。貝萊德中國股票主管朱悅表示，該行對大中華市場仍持正面看法，有部份A股板塊高得不可持續，如中小企及鐵路板塊，但大部份板塊估值屬於可接受水平，整體不算出現泡沫。

        佢認為H股個別銀行、房地產商、新能源及中小企板塊仍具投資機會，在內地資本開放提升及互聯互通措施之下，會提升H股成交量，減少估值折讓。佢估計，目前H股市盈率低於歷史水平，在可見將來，港股有機會達到平均13至15倍市盈率。

        花旗私人銀行亞太區投資策略師彭程同樣認為，內地股市個別股份肯定存在風險，但並非整體股市。但如果缺乏政策及資金支持，A股再創新高仍需要一段時間。彭程提到，港股向來由機構投資者主導，歐洲央行及日本央行的量寬措施，環球投資者的風險胃納有改善，加上內地持續推進改革開放，料港股會因此受惠，預期未來數月港股會跑贏A股。該行短線較看好鐵路基建股及內銀股，長線則看好互聯網及醫療板塊。

        外資對港股睇法好似稍為改善，加上上證兩日回升4.67%，令港股企穩27400點收市。恒生指數收造27404點，升71點；國企指數收報13684點，升75點，但睇成交縮至1170億元，加上個市已經四連升，想買貨可以考慮等佢回調先。

        呢期市場興炒派送股，昨日紅股除淨的匯隆控股（8021）股權易手，向新光資本及祝振駒全資擁有翱翔投資配售新股，股份復牌暴升逾2倍，市值去到48億元。

        集成明玩分身術

        創業板股炒到飛天唔出奇，半新股集成傘業（1027）又炒上都令人驚歎。該公司中午發通告稱不知升因，午後升幅一度收窄，收報2.18元，升22%。集成今年初上市，之前曾宣佈一拆二十五，喺短短唔夠半年時間，股價差不多上升近50倍。證監會早前曾就公司股權分佈進行查訊，結果顯示該公司4月27日有16名股東合共持有1.44億股，相當於該公司已發行股本之24.02%，連同主要股東持有4.5億股，相當於該公司已發行股本總額之99.02%。因此，僅590萬股由其他小投資者持有，佔已發行股份0.98%。

        細價股炒拆細分身，已經玩了幾十年，不過橋唔怕舊、最緊要受，如果小股民想趁墟坐順風車，就要搞清楚呢？股份分身術都係掩眼法，總之一個「炒」字啦。

        陸羽仁