港鐵的最怕066

最多新聞應該算是港鐵（066），爆完列車意外，又爆高鐵延遲，仲有高層落馬。不過，睇番股價似乎就暫時對股價唔係最大影響，佢股價過去一年最高係32.5元，呢個價差不多係去年中造出，跟住就一度回落，最低去過26.31元，呢個係今年2月左右出現，跟住股價已經反彈。

        從走勢嚟睇，港鐵係半隻地產股，股價似乎受地產市道影響，多過受營運表現或新聞影響。去年頭雖然政府打壓樓價，但效果不彰，樓價不跌反升，於是帶動港鐵股價上升，到了今年樓價回落，市場較為憂慮，佢股價跟住下跌，呢兩個月見到政府無再出招打壓樓市，佢嘅股價就穩定下來，就算出現諸多壞消息，似乎仲未影響到投資者的信心。

        港鐵怕樓跌多過怕官

        聽會計界高人話，港鐵收入之中，有十幾億來自管理層同顧問費用，呢啲相信包括幫政府管理高鐵項目，至於港鐵做呢啲工程有無因為超支抑或疏忽被索償的風險呢？

        年報似乎無交代，咁樣會唔會影響未來盈利呢？中環茶友就答，若然係外國經常打官司的地方，當然唔排除港鐵會被人告啦，但香港唔興呢家嘢喎，而且港鐵獨家之局唔係咁易打破，所以搞瓜幾個高管唔難，要搞瓜成家公司就唔係咁易，究竟��家呢啲工程延誤有無索償風險，管理層最好交代吓啦。

        不過，從過去經驗，港鐵唔怕官、只怕管，尤其係最怕管樓市，除咗呢樣，其他都唔係咁驚㗎咋。